Nor gara

Gordailua Gipuzkoako Foru Aldundiaren Ondare Bildumen Zentroa da. Lurraldeko kultur ondarea biltzea, zaintzea eta ezagutaraztea du helburu nagusi. Gordailua elkargune bat da, jabe eta jatorri desberdinetako funtsak zaintzen ditu eta. Bilduma bateratua osatu ez ezik, kudeatu ere elkarlanean kudeatzen du. Milaka ondare-gai etnografiko, artistiko eta arkeologiko gordetzen ditu. Bere funtsei buruzko azterketak egiten ditu, bai eta kultur ondareari buruz besteen ikerketak erraztu ere.

Gordailua baliabide-zentro bat da. Gipuzkoako museo sareari laguntza eta zerbitzuak eskaintzen dizkion plataforma bat da, baliabideen optimizazioa eta iraunkortasuna sustatzen dituena. Gordailuak Gipuzkoaren memoriaren artxibo materiala eratzen du.

Zer da Gordailua?

Gordailua Kultura, Turismo, Gazteria eta Kirol Departamentuari atxikita dago. Gipuzkoako Foru Aldundiaren ondare bildumak biltzen ditu. Halaber, San Telmo Museoaren eta zenbait erakunde publiko eta pribaturen ondasunak ere gordetzen dira bertan; adibidez, Nestor Basterretxearen obra. Gehienbat etnografiako piezak eta artelanak dira, 100.000 ale baino gehiago guztira.

2015. urteaz geroztik, Gipuzkoako Arkeologiaren eta Paleontologiaren biltegia ere bada, lurralde honetan burutu diren indusketetan, prospekzioetan eta aurkikuntzetan ezustean atzeman diren pieza arkeologikoak eta paleontologikoak zaintzeko. Gordetegi honetan 12.000 kaxa baino gehiago daude.

Bere eskurapen-programa gauzatzeaz gain, partikular edo erakunderen batek zerbait eman, saldu edo utzi nahi badu, Gordailuak proposamena hainbat irizpideren arabera aztertzen du: jatorria, kontserbazio-egoera, bildumen hutsuneak betetzea, garai, toki, sektore sozial baten adierazle esanguratsua izatea, eta abar.

Eraikina

Eraikina Pedro Astigarraga eta Jose Leon Lasarte arkitektoek diseinatu dute. 2009. eta 2011. urteen artean eraiki da. Oinplanoa angeluzuzen handi bat da, eta lau fatxadetako xaflek edukiontzi itxura ematen diote. Hori guztia dela eta, eraikin bakana da, inguratzen duten bizitoki eta lantegien artean ikusgarria. Lorategiarekin batera, 3445 m2 hartzen ditu; guztira, bada, 9116 m2-ko azalera eraikia du, hiru solairutan banatuta.

Objektuak zortzi biltegitan gordetzen dira, hedadura osoaren % 70; hots, 6.000 m2 inguru. Objektuek beren material eta konposizioaren arabera behar duten hezetasun eta tenperatura mailei eusten zaie, betiere hezetasun erlatiboa % 60tik behera eta tenperatura 18 eta 20 gradu artean. Ehunak, paperak eta metalak gordetzeko areto bereziek egokitutako parametroak dituzte.

Horrez gain, badaude bulegoak, gai arkeologiko, paleontologiko, etnografiko eta artelanentzako zaharberritze-tailerrak, erregistratzeko eta argazkiak egiteko gelak, igarotze eta berrogeialdiko guneak, liburutegia, ikerketa eta kontsultarako bi gela, bai eta balio anitzeko bi areto ere, hitzaldiak, tailerrak, erakusketak, eta abar antolatu ahal izateko.

Kanpoko energiaren kontsumoa gutxitzearren, eraikinak geotermia egitura bat dauka, eta hainbat eguzki-panel azotean. Ondarearen kontserbazio egokiak eskatzen dituen baldintza klimatikoak etengabe bermatze aldera, argindar-sorgailu autonomo bat ere badago, hornidura elektrikoak huts egingo balu automatikoki abiaraziko litzatekeena.

Nola heldu

Harremanetarako

Gordailua, Gipuzkoako Ondare Bildumen Zentroa

Aurretiko hitzordua

Gordailua bisitatzeko, beharrezkoa da aurretiko hitzordua eskatzea. Hauta ezazu zeure bisita mota zerbitzuak atalean, edo zuzenean gurekin harremanetan jarrita.